Бугун яхши ўйинлар бор. Улардан бири Испания чемпионатида "Гранада" ва "Барселона" ўртасида ўтказилади. Сарлавҳани кўриб тушундингиз, бу бошқа Луис Суарес, колумбиялик. Бироқ у айни вақида уругвайликдан қолишмайдиган даражани намойиш этмоқда. "Барселона" барибир фаворит, тушунарли, шундай бўлсада Хави жамоаси сўнгги ғалабаларни қон билан қўлга киритмоқда. Яъни қийналиб.

Суарес ягона муаммо эмас. "Гранада"ни анча талантли мураббий Роберт Морено бошқаради. Ашаддий мухлислар унинг "Барса"да ишлаб кетганини билади. Морено анча вақт Луис Энрикенинг ёрдамчиси сифатида фаолият олиб борган. "Рома", "Сельта", "Барселона" ва Испания терма жамоасида улар биргаликда ишлашган. Кейин Морено ажралиб чиқиб индивидуал фаолиятни бошлади. Асли каталониялик мураббий тактика устаси ҳисобланади. Бу мавзуда туркум китоблар муаллифи. Номи 4-4-2. У қандай тактикани яхши кўришини китоб номидан тушунсак бўлади. Мураббийликдан аввал видео-таҳлилчи бўлган. Гранада унинг учун синов зонаси. Таркиб кучли эмас, катта натижалардан умид йўқ. Фаворитларнинг бироз қонини ичиши мумкин ҳолос. Мана яна бир имконият.

"Барселона" ҳамон тўлиқ таркибда эмас. Жароҳат олганлар ва ковидчилар бор. Асосийлардан Депай, Дест ва Гави қайтгани ижобий ҳолат. Дембеле ва Люк де Йонг эса формага тушиб олишди. Хави Суперкубок класикоси олдидан ротация қилиши ҳам мумкин. Ҳозирча шу маълумотларни қабул қиласиз, қолганини 22:30 да Футбол каналида бўладиган трансляцияда гаплашамиз.

Даврон Файзиев.