«Нефтчи» ва «Динамо» ўртасидаги ўйиндан сўнг бўлиб ўтган матбуот анжуманида дастлаб меҳмонлар устози Аҳмад Убайдуллаев қатнашди. Жамоаси мағлуб бўлгани туфайли мураббий анча тушкун ҳолда кириб келди.
- Учрашув ҳақидаги фикрларингиз қандай?
- Учрашувни ҳамма кўрди. Илтимос қилардим, ўйин ҳақида мендан сўраманглар. Баҳс мен кутгандек бўлмади. Ҳозир бу ўйин ҳақида ўйлашни истамайман.
- Бугунги ўйинда кимни алоҳида ажратиб кўрсата оласиз?
- Ҳеч бир ўйинчини алоҳида ажратиб кўрсата олмайман, жамоадаги барча ўйинчилар бирдек ҳаракат қилишди. Умуман олганда бугун ажратиб кўрсатишим мумкин бўлганлар бу мухлислардир. Улар бошқа мухлислардан анча кучли эканликларини айтишни истардим.
- «Нефтчи» жамоаси ҳақида нима дея оласиз?
- Рақибимиз анча шаклланга жамоа, бу жамоа ОФК кубогида қатнашмоқда. Шу сабабли ҳам улар мавсумга биздан кўра жиддий тайёргарлик кўрганини бугунги ўйиндан ҳам билиб олиш мумкин.
- Кейинги режалар қандай?
- Режалар яхши ўйин кўрсатиб иложи борича юқори ўринларни олиш ва Самарқанд футболини ривожлантириш. Шунингдек Самарқандлик мухлисларни хурсанд этишдир.
- Шогирдларингиз ўйинидан қанчалик даражада қониқдингиз?
- Йўқ, шогирдларимдан нолимайман. Аммо баъзи бир ўйинчиларимиз топшириқаларимни бажара олишмади. «Нефтчи»ни ҳужумлари кучли бўлгани сабабли улар ғалаба қозонишди. 0:1 ҳам, 0:5 ҳам мағлубият.
