Неаполь клуби президенти Аурелио Де Лаурентиснинг айтишича, Турин клуби сафида сўнгги мавсумини ўтказаётган ҳужумчи Алессандро Дель Пьеро билан шартнома имзолашга тайёр.
— Алекснинг ўйинларидан доим баҳра олганман, ҳаттоки уни "Наполи"га ўтказишга ҳаракат ҳам қилиб кўрганман, — дея Де Лаурентиса сўзларини келтиради La Repubblica. — Менга унинг клуб ва анъаналарга содиқлиги доим ёққан. Ишонтириб айтаманки, ҳар қандай кўринишда: ўйинчими, мураббийми ёки маслаҳатчими, Неаполда унга доим жой топилади. Гарчи унинг ўзида "Ювентус" истиқболи учун меҳнат қилишни истаги кучлироқ бўлса-да.
Эслатиб ўтамиз, 2011 йилнинг сўнгида "Кекса синьора" директори Андреа Аньелли 1993 йилдан буён клубда тўп сураётган Дель Пьеро мавсум тугагач клубни тарк этишини эълон қилган эди. Форварднинг хизматларидан Италиянинг ўзида бир неча жамоа, шунингдек Американинг МЛСси, Яқин Шарқ ва Хитой клублари фойдаланиш истагида.
Италия "А" Сериясининг жорий мавсумида 37 ёшли маэстро 16 ўйинда 1 та гол киритган.
