Ла Лига Эрлинг Холандни сотиб олиш учун “Реал Мадрид”га фоизсиз кредит бериши мумкин, дея маълум қилди Испания чемпионати президенти Ҳавьер Тебас Лига ривожланишига бағишланган йиғилишда.
Функционернинг сўзларига кўра, “Оғир замонда топ-клублар ва умуман футбол келажаги бевосита ёш истеъдодларга боғлиқ, шу боис, жумладан, бошқа лигалар билан рақобатлашиш учун имкон қадар кўпроқ ёш юлдузларни жалб қилишимиз керак.
“Барселона”да қанча истиқболли футболчилар борлигини аниқ кўриб турибмиз ва афсуски “Реал Мадрид” ёши каттароқ футболчилар билан ўйнамоқда. Шунинг учун биз клубга 23 ёшгача бўлган футболчиларни сотиб олиш учун 100 миллион евро миқдорида фоизсиз кредит таклиф қилишга қарор қилдик. Албатта, ажратилган пулни қандай сарфлашни, Эрлинг Холанд каби бир суперюлдуз ёки бир нечта истиқболли футболчиларни сотиб олишни клубнинг ўзи ҳал қилади.
Мақсадимиз яна бир бор “эл-класико”ни дунёдаги энг ажойиб спорт тадбирига айлантиришдир”, деди Тебас.
