Баъзи клублар ақл бовар қилмайдиган даражадаги истеъдодли, аммо қийин характерга эга футболчиларни сотиб олиш имконияти бўлса-да, ундай турдаги ўйинчиларни харид қилишда қўрқишади. Бошқа турдаги жамоалар эса таваккал қилиб, уларни бир неча миллион евро эвазига сотиб олишади. “Барселона” ва “Арсенал” шундай харидларни амалга оширган ва ҳозирда бундан қаттиқ афсусланмоқда. Усмон Дембеле ва Пьер-Эмерик Обамеянг каби футболчилар юқоридаги клубларга ҳақиқий бош оғриқ бўлмоқда. Қизиғи, ҳар икки футболчи ҳам Дортмунднинг “Боруссия” клубидан “қизил-анорранглилар” ва “тўпчилар” сафига кўчиб ўтган. “Stadion.uz” нашри нега ушбу клублар қишки трансфер ойнаси ёпилгунга қадар, бу футболчилардан қутулишга ҳаракат қилаётгани ҳақида бироз маълумот беришга қарор қилдик.
Дембеле ва “Барселона”
Каталония клуби директори Матеу Алеманининг айтишича, Усмоннинг агентлари шартномани олти ойга узайтириш вариантларини рад этишган ва ҳужумчи келажакда “Барса” сафида қолмоқчи эмас. Шу сабаб, клуб Дембеледан тезроқ қутулиш керак деган қатий қарорга келди. “Кўк-анорранглилар” ҳатто 31 январгача унинг кетишини амалга ошириш учун ижара вариантини ҳам кўриб чиқишга тайёр. Футболчи ва унинг агентига жамоага фақат фидойи футболчилар кераклиги айтилган. Аввалига бош мураббий Хави Усмон “Барселона” етакчисига айланиши мумкинлигига ишонганди. Бироқ, футболчи маошини кескин даражада оширишни истади ва каталонияликлар ҳозирги молиявий муаммолар сабаб француз футболчисини сотиб юборишга қарор қилди. Дембеленинг агенти “Барса”дан мижози учун солиқлардан ташқари 43 миллион евро маош сўради.
Усмоннинг ўзини замонавий футболнинг асосий юлдузи деб билади ва шунинг учун бу мақомга мос келадиган маош сўрайди. У “Барса”дан 5 йил давомида 200 миллион еврога яқин пул ишлаб олишни режа қилди. Футболчи қишда кетиш ниятида эмас. Сабаби, “Ньюкасл”дан ташқари, унга даъвогар жамоалар деярли йўқ.
Яқинда “Атлетик”бўлган билан ўйинда Дембеле аризага ҳам киритилмаганди. Маълум бўлишича, агар, Усмон жамоа билан шартномани узайтиришдан бош тортса, “Барса” уни мавсум охиригача заҳира ўриндиғига михлаб қўяди. Бу ҳақда унга шахсан Хавининг ўзи айтди. Бош мураббийга бундай футболчилар керак эмас.
Дембеле Дортмундда ўзи яшаган квартирага зарар етказгани учун уй эгаси футболчини судга берган, қолаверса француз тез-тез овқат ейишни ва газланган сув ичишни яхши кўради, тунгача “Playstation” ўйнаб, кейин машғулотларга кечикиб юрадиган одати ҳам бор. Бир марта жароҳат олгандан кейин тиббий кўрикдан ўтиш ўрнига, Сенегалда дам олиш учун учиб кетган. Афтидан, Дембеле каталонияликлар тарихидаги энг катта хато трансфердан бири бўлган. Клуб 2017 йилда футболчининг трансфер нархи бор-йўғи 33 миллион бўлса-да, “Боруссия”га 140 миллион евро берган. “Барса”га ўтгандан сўнг, унинг нархи нақд 120 миллион еврога кўтарилган эди, аммо, ҳозир футболчининг трансфер баҳоси роппа-роса тўрт баравар тушиб кетган (30 миллион евро).
Обамеянг ва “Арсенал”
Декабрь ойи ўрталарида “Арсенал” бош мураббийи Микел Артета нотўғри хатти-ҳаракатлари туфайли Пьер-Эмерик Обамеянгни сардорлик боғичидан маҳрум қилган эди. У касал бўлган онасини кўриш учун Францияга учиб кетди, аммо у ваъда қилинган вақтдан кечроқ қайтиб келди ва келганидан сўнг карантин қиодаларига риоя қилмади. Дембеле сингари, Обамеянг ҳам машғулотларга кечикиб келишни яхши кўрарди. Бу ҳақда нафақат Артета, балки ўша пайтда “Боруссия Д” бошқарувида ишлаган Томас Тухелга ҳам маъқул келмаган. Икки ҳафта ўтгач, Артета ҳужумчини режаларига киритмаслигини айтди. Ҳатто, футболчининг ўрнига сотиб олиниши керак бўлган ўринбосарлар рўйхатини ҳам маълум қилди: Душан Влахович, Александр Исак, Олли Уоткинс ва Доминик Кэлверт-Льюин. Ҳозирда габонлик футболчи “Арсенал”нинг энг катта муаммоси. Тўрт йил аввал “канонирлар” Дортмунд клубига 64 миллион евро тўлаб, футболчини сотиб олганди.
Дастлабки икки йил давомида Пьер-Эмерик яхши ўйин намойиш этди, аммо 2020 йилнинг кузидан сўнг барчаси изидан чиқиб кетди. Обамеянг “Арсенал” билан ойига тахминан 1 миллион евро маош оладиган янги шартнома имзолаши биланоқ, габонликнинг ўйин сифати тушиб кетди ва буни статистика ҳам кўрсатиб турибди. Қийинчиликлар 2021 йилнинг баҳорида, Обамеянг Габон терма жамоаси сафида безгакка чалинганидан сўнг янада оғирлашди. Ҳозирда “Арсенал” футболчини Африка кубогида қатнашишига рухсат берди, аммо у турнир бошланишидан олдин яна карантин қиодаларина риоя қилмади. У жамоадоши Марио Лемина билан тунги клубда ниқобсиз дам олди, шундан сўнг иккаласи ҳам коронавирусга чалиниб қолди. Қолаверса, улар клубдан эрта тонгда қайтиб келган ва меҳмонхона хавфсизлиги ходимларини жанжаллашиб қолди. Габон терма жамоаси федерацияси футболчиларни четлатишдан бошқа чораси қолмади.
Обамеянг зудлик билан клуб жойлашган базага қайтди ва тиббий кўрикдан ўтади. “Арсенал” айни пайтда унга харидор қидирмоқда. Футболчи аллақачон 32 ёшда эканлигини, унинг катта молиявий талаблари ва ёмон хулқи сабаб, унга харидор жамоалар сони чегараланган. Ҳозирча фақат Саудия Арабистонининг “Ан-Насср” клубидан таклиф бор.
Ушбу муаммолардан сўнг, Обамеянгнинг трансфер нархи 15 миллион еврога тушиб кетди, аммо “канонирлар” футболчи учун ойига 1 миллион евро маош тўламаслик учун уни арзонроққа сотишга ҳам тайёр.
