Лондоннинг "Челси" клуби бош мураббий вазифасини вақтинча бажараётган Роберто Ди Маттео Англия Футбол Ассоцияциясини қаттиқ танқид остига олди.
Италиялик мураббий Лондонликларнинг Англия кубоги доирасида "Тоттенҳем"га қарши ярим финал учрашуви санасини ўзгартириш таклифини рад этган АФА қароридан норози.
15 апрел куни "Челси" "Тоттенҳем"га қарши баҳсда майдонга тушиши керак. Агар Лондонликлар "Бенфика" тўсиғидан ўта олсалар, 18 апрел куни ЧЛ ярим финалида ҳам майдонга тушишлари керак. "Челси" эса "Тоттенҳем" билан бўлиб ўтадиган баҳсни ҳар эъҳтимога қарши бошқа муддатга суришни сўраган.
"Биз ҳали "Бенфика"ни мағлубиятга учратишимиз керак. Аммо барибир АФАнинг бизнинг илтимосимизни инобатга олмагани ачинарли ҳол. Ассоцияция бошлиқлари бизни ҳатто эшитишни ҳам исташмади. Бу жуда кулгули ва шу билан бирга ачинарли ҳол" дейди Ди Маттео, клуб расмий сайтига берган интервьюсида.