Шу вақтгача Европа оммавий ахборот воситаларида айни дамда Мадриднинг "Реал" клубида жуда чиройли ўйин кўрсатаётган португалиялик футбол юлдузи Криштиану Роналдунинг "Манчестер Сити"га ўтиши мумкинлиги борасида хабарлар тарқатилаётган эди.
Футболчининг агенти Жорже Мендешнинг "Marca" газетасига берган интервьюсига кўра, Криштиану Роналду янги мавсумни "шаҳарликлар" сафида бошлайди.
"Манчестер Сити" амалдаги шартномаси 2015 йилда ниҳоясига етувчи футболчи учун Мадриднинг "Реал" клубига 82 миллион фунт стерлинг (131 миллион АҚШ доллари) миқдорида товон пули тўлашга тайёр.
27 ёшли футбол юлдузининг янги клубидаги маоши эса ҳафтасига 425 минг фунт-стерлинг (680 минг доллар)ни ташкил этади. Айни вақтда "Сити"даги энг кўп маош олувчи футболчи – Карлос Тевес ҳисобланади. Унга ҳафтасига 198 минг фунт-стерлинг тўланади.
Сўнги 40 йилнинг энг самарали ҳужумчиси ҳисобланувчи Криштиану Роналду Португалия терма жамоаси либосида 88 та ўйинда майдонга тушган ва 32 та гол киритган. Ла-Лигада "Реал" учун у 93 ўйинда 103 та гол урган.
