"Арсенал"нинг собиқ бош мураббийи, ҳозирда ФИФАнинг глобал ривожланиш департаменти раҳбари Арсен Венгер жаҳон чемпионатини ҳар 2 йилда бир марта ўтказиш ғояси ҳақида гапирди.

“Ҳаммасини футбол олами ҳал қилади. Мендан терма жамоалар учун ўйинлар тақвимини ташкил этишни сўрашди, лекин тушунишингиз керакки, 2028 йилгача, ҳатто 2030 йилгача ҳам ҳеч нарса ўзгармайди, чунки ЖЧ-2026 ва Евро-2028 аллақачон режалаштирилган. Шундан кейин Миллий федерациялар қарор қабул қилади.

Мавсум якунида саралаш баҳсларини гуруҳлаш ва йирик турнирларни ўтказиш орқали клублар ва терма жамоалар ўртасида кескинлик камайиши учун тақвимни ташкил қилишни таклиф қиламан. Биз тўрт йиллик даврга эга тизимда ўсганмиз. Футбол олами одатда ўзгаришларга чидамли ва бизнинг лойиҳамиз бутун тақвимни ағдариб юбораётгани ҳақиқат.

Аммо ёш авлодга қарасангиз, 10 ёшдан 18 ёшгача бўлган ёшларда вақт ҳақидаги тасаввурлари бир хил эмас, воқеаларга бўлган талаби бошқача. Менимча, ҳозир одамлар доимо муҳим воқеалар билан озиқланиши керак, чунки улар бунга ўрганиб қолган. Кўрамиз, ҳаммаси 2024 йилгача ҳал бўлади", - дея Венгернинг сўзларини келтиради L’Equipe.