«Барселона» бош мураббийи Хосеп Гвардиола «Атлетик»га қарши Испания чемпионати 31-тур учрашувидан сўнг ўз фикрлари билан ўртоқлашар экан, бильбаолик футболчиларни мақтади, дея хабар бермоқда «Championat.com».

Эслатиб ўтамиз, «Камп Ноу»да ўтказилган баҳс 2:0 ҳисобида «Барселона» ғалабаси билан якунига етди.

«Шальке-04»га қарши оғир сафар ўйинини ўтказган «Атлетик» бизга яхшигина сабоқ берди. Бугунги ўйинда улар бизни кўп қийин аҳволга тушириб қўйишди. Яхшиямки, ҳимояда ишончли ўйин кўрсата олдик», деди каталонияликлар устози.

«Шогирдларим анчадан бери ҳимояда бу ўйиндагичалик ишончли ҳаракат қилишмаганди. Акс ҳолда, рақиб бугун каттароқ натижага ҳам эришган бўларди», деди Гвардиола.

25 май куни Испания Кубоги финалида Бильбао жамоаси «Барселона»га қарши майдонга тушади. «Умид қиламанки, бу жамоага қарши финал ўйини жуда қизиқарли бўлади», дея қўшимча қилди «Барселона» бош мураббийи.

Гвардиоланинг қўшимча қилишича, Мадриднинг «Реал» жамоси сафарда «Осасуна»ни йирик ҳисобда мағлуб этгани уни ҳайрон қолдиргани йўқ, чунки «мадридликлар мавсум давомида кўп гол уришмоқда».