Федерико Кьезанинг жиддий жароҳат олиб, таркибда кадрлар муаммоси юзага келганига қарамай, "Ювентус" бош мураббийи Массимилиано Аллегри Деян Кулусевскига нисбатан ўз фикрини ўзгартирди.

Италиялик журналист Николо Скиранинг тарқатган маълумотига қараганда, "Фиорентина" ҳужумчиси Душан Влаховични "Ювентус" таркибига келиб қўшилиши клубда маошларни тартибга солиш заруратини келтириб чиқармоқда, шу сабабли, 21 ёшли футболчининг жамоадан кетиши мумкин.

Кулусевскининг бошқа жамоага ўтиши бўйича музокаралар Кьезанинг жароҳат олган пайтида тўхтатилганди, лекин, Испаниянинг "Севилья" клубидан келиб тушган таклиф "Ювентус"нинг фикрини ўзгартирди.

Жорий мавсум Деян "Ювентус" таркибида 27 та ўйинда майдонга тушиб, иккита гол киритди ва учта голга ассистентлик қилди.

Transfermarkt портали унинг трансфер нархини 30 миллион евро атрофида баҳоламоқда.