«Интер Майами» ҳужумчиси Гонсало Игуаин ўзини жамоада ажойиб ҳис қилаётганини тан олди.

«Майами шаҳрида мен тинчгина яшайман. Мен излаган ҳиссий барқарорликка эришдим. Ҳақиқат шуки, мен бахтлиман. Бу шаҳар менга йиллар давомида излаганим – тинчликни берди. Мен бу шаҳарни ва бу клубни жуда ҳурмат қиламан. Мен бу ерда топган хотиржамликни ҳеч нарсага алмаштирмаган бўлардим», — дея Игуаиннинг сўзларини келтиради TyC Sports.

Эслатиб ўтамиз, Игуаин 2020 йилда «Интер Майами»га ўтган эди. 2021 йилги мавсумда 34 ёшли футболчи МЛС чемпионатининг 30 та учрашувида қатнашиб, 12 та гол урди ва 7 та голли узатмани амалга оширди. Бунгача Игуаин «Ривер Плейт», «Реал», «Наполи», «Ювентус», «Милан», «Челси» каби клубларда тўп сурган.