Жорий мавсум бошида, аниқроғи, Испания Ла-Лигаси 8-турида «Атлетико» ўз майдонида «Барселона»ни тор-мор келтирди - 2:0. Савол туғилади: нега тўсатдан айнан шу учрашув ёдга олиняпти? Гап шундаки, Мадриддаги баҳсда бош қаҳрамон бўлган Луис Суарес (уругвайлик футболчи аввалига Тома Лемар голига ассистентлик қилган, кейин рақиб дарвозасини ўзи ҳам нишонга олганди) ижобий хатти-ҳаракати билан эътибор марказига тушганди. Яъни асовроқ табиатли ҳужумчи Каталония клуби билан ёмон хайрлашганига қарамай, ўз голини ҳам, ғалабани ҳам алоҳида нишонламаганди. У бу билан собиқ жамоасига сукут кўринишида раҳмат йўллади. Энг қизиғи, Луис Суарес яна бир собиқ жамоаси - «Ливерпуль» дарвозасига урган дастлабки голини нишонлашдан тийилмаганди. Умуман олганда, замонавий футболда топ даражадаги ўйинчиларнинг собиқ жамоалари дарвозасига урилган голдан кейин хурсандчилик қилмасликлари урфга айланиб улгурди. Бу ҳурмат белгиси, албатта.
* Криштиану Роналду мавсум-2012|2013да «МЮ» дарвозасига 2та гол урди ва ҳар иккисини нишонламади. Ўшанда «Реал» ЧЛ 1|8 финалида «Юнайтед» билан тўқнаш келганди. Ҳаммаси - сэр Алекс Фергюсонга ҳурмат ифодаси.
* Криштиану Роналду ва «МЮ» йўллари 2018 йили ҳам кесишди - бу вақтда Ферги «қизил иблислар» бошқарувида эмасди. Шунинг учунми, Криштиану бу гал голни эффектли тарзда нишонлади - трибуналарга мукаммал мушакларини кўрсатди.
* Криштиану Роналду ЧЛда собиқ клубларидан фақат «МЮ» эмас, балки «Спор-тинг» дарвозасини ҳам ишғол қилган. 2017|2018 йиллар мавсумида Криш илк жамоасига қарши баҳсда жарима зарбасидан чиройли гол урди ва сукут сақлашни маъқул кўрди - у аввалига қўлларини юқори кўтарди, кейин дарҳол тушириб, узр сўрагандек бўлди. Португалиялик юлдуз кейинчалик ўз хатти-ҳаракатини чиройли сўзлар ёрдамида ифодалади: «Айнан шу клуб туфайли ҳозирги ҳолатдаман».
* Тўғри, Криштиану Роналду 2008 йили бошқача ўйларди: «Спортинг» дарвозаси томон йўлланган идеал жарима зарбасидан сўнг дабдабали юз ифодасини кўрсатганди.
* Муҳаммад Салоҳ ҳам икки ҳолатда голини нишонламади: мисрлик футболчи аввалига АПЛда «Челси»га қарши баҳсда сукут сақлади.
* Иккинчи ҳолат ЧЛдан ўрин олган «Рома» билан олишувда кузатилди. Ўшанда Муҳаммад Салоҳ гўёки, Роберто Фирмино ортига яшириниб олди...
* Энг драматик воқеа Фрэнк Лэмпардга тааллуқли, албатта. У захирадан майдонга тушди ва ўйиннинг энг охирги лаҳзаларида «Челси» дарвозасини ишғол қилди. Табиийки, Фрэнк «аристократлар»га ҳурмат белгиси ўлароқ, жим турди.
* Яна «Челси» афсоналари ҳақида: Фернандо Торрес ЧЛ-2013|2014 ярим финалида «Атлетико» дарвозасига йўл топди. У қуръадан кейиноқ гол урган тақдирида ҳам, уни нишонламасликка сўз берганди. Торрес ваъдасига хилоф иш тутгани йўқ.
* Робин ван Перси «МЮ» сафидаги илк голларидан бирини «Арсенал» дарвозасига йўллади. Албатта, ҳеч қандай нишонлаш ҳаракати йўқ.
* Тўғри, Робин ван Перси кейинги мавсум «Арсенал» мухлислари нафратига жавобан ўз голини рисоладагидек нишонлади.
* «МЮ»дан яна бир мисол: «Вест Хэм»да ижара муддатини ўтаган Жесси Лингард 16та ўйинда 9та гол ва 5та самарали узатма қайд этиш асносида фаолиятини қайта изга солди. Кейин «Юнайтед»га қайтди ва «болғачилар» дарвозасига урган голини нишонлагани йўқ.
Энг қизиғи, нишонланмаган голлар ҳақидаги ҳикояга терма жамоалар футболидан ҳам мисоллар келтириш мумкин.
* Антуан Гризманн Уругвай термаси дарвозасига гол уриб, сукут сақлади. Зеро, Франция миллий жамоаси вакили Уругвай маданиятини яхши кўради. Антуан кўпинча бир томондан уругвайлик эканлигини яширмайди. Қолаверса, «Реал Сосьедад»да Гризманни кашф этган мураббий Мартин Ласарте уругвайлик, яна «Атлетико» афсонаси Диего Годин ҳам.
С.РАҲМОНОВ тайёрлади
