«Барселона» январь ойида ҳужум чизиғини тубдан янгилади ва янги ҳужум триосини ташкил қилди. «Stadion.uz» нашри Хавининг янги ўйинчилар билан нималарни ўзгартира олиши ҳақида бироз фикр юритишга қарор қилди.
Хави «Барселона» бошқарувига келган илк кунларида ҳужум чизиғи бўйича кўплаб муаммоларган дуч келди. Испаниялик мутахассис асосий ўйинларда гол уришга эришиб, жамоасининг ғалабасига ёрдам берган Люк де Йонгга ишонч билдирмади. Усмон Дембеле билан янги шартнома имзолаш бўйича муаммога дуч келди ва Хави франциялик футболчини жамоада қолишини, қолган тақдирда ҳам ортиқ майдонга туширмаслигини билдирди. Ансу Фати жароҳатлар билан боғлиқ муаммога ўралашиб қолган. Натижада, мураббий базага «Ла Масия» тарбияланувчиларини жалб қилишга мажбур бўлди - Ютгла, Абде, Акомач.
Бироқ, бу футболчилар билан юқори натижаларга эриша олмаслигини пайқаган клуб раҳбарияти январь ойида янги голеадор ҳужумчи сотиб олишга қарор қилди. «Барселона» 21 ёшли Ферран Торрес учун «Ман Сити»га 55 миллион евро тўлашга мажбур бўлди. Бу ёш ва тажрибали футболчини қўлга киритилиши, кўплаб мутахассислар томонидан яхши қабул қилинди. Шундан сўнг, «кўк-анорранглилар» клуб тарбияланувчиси бўлган Адама Траорени ижара асосида ўз сафига қўшиб олди. Агар, Адама Каталония клуби сафида яхши натижалар кўрсата олса, «Барса» уни ёзда тўлиқ сотиб олиши ҳақидаги банд шартномага киритилди. Шунингдек, трансфер ойнасини сўнгги кунида эркин агент сифатида «Арсенал»ни тарк этган ва Лондон жамоаси билан кўплаб муаммоларга дуч келган Пьер-Эмерик Обамеянгни ўз сафига қўшиб олди. Натижада «Барселона» янги ҳужум триосини шакллантирди. Эътиборли томони шундаки, юқорида номи келтирилган ҳар уч футболчи ҳам яқин-яқингача Англия Премьер-лигасида ўйнаган. Албатта, бу МСН триоси эмас, лекин ФОТ номи остида ташкил этилган янги учлик кўплаб рақибларга қийинчилик туғдириши тайин.
Энг қизиғи, Хави Траорени қандай позицияда ўйнатади деган савол бор. Адама ҳам худди Ферран Торрес каби ўнг қанот ҳужумида ўйнашди. Ҳар икки футболчини катта умидлар билан қўлга киритган жамоа қайси фтболчига ишонч ббилдиради?! Ана шу савол очиқ! Таҳлил қилиб кўрадиган бўлсак, каталонияликлар ижара асосида ўйнайдиган футболчига эмас, балки аллақачон тўлиқ сотиб олинган ёш испанияликка кўпроқ ишонч билдириши мумкин. Шунингдек, улардан бирини чап қанот ҳужум чизиғида ўйнатиши ҳам мумкин, аммо Хави Куман илтимосига кўра шартнома имзоланган Депайга, жароҳатини тиклагандан сўнг, асосий таркибга қайтиши кутилаётган Фати учун қаердан жой топиш ҳақида ўйлашига тўғри келади.
Албатта, Депай марказда ўйнаса бўлади. Голланд футболчиси бу ўрин учун Обамеянг билан кураш олиб боради. Габонлик футболчининг ўйин услубини кузатиб бориш қизиқ бўлса керак. Чунки, сўнгги мавсумда «Арсенал»да деярли ўйин амалиётига эга бўлмаган футболчи Каталонияда нималарни қойиллатиши мумкин?! Аммо, Пьер-Эмерикнинг ўйин салоҳиятини ҳисобга олиб айтишимиз мумкинки, Габон терма жамоаси сардори «Барса» сафида ярим мавсум давомида камида 10+ гол уришни уддаласа керак. Қолваерса, Испания Ла Лигаси ўйин борасида Англия Премьер-лигасидан пастроқ. Обамеянг эса 32 ёшда ва у яна бир-икки йил юқори даражада ўйнаши мумкин. Эсингизда бўлса, аввалига Хави Алваро Моратани сотиб олишни хоҳлаган эди, аммо клуб раҳбарияти «Реал»нинг собиқ ҳужумчиси трансфери борасида «Атлетико» ва «Ювентус» билан келиша олмади. Алваронинг ҳам ёши деярли Пьер-Эмерик билан деярли бир хиллигини ҳисобга олсак, «Барса» мухлислари Мората борасида хафа бўлмаса ҳам бўлишади.
Ҳар ҳолда, Хави энди асосий таркибга қандай футболчини қўйиш ҳақида эмас, аксинча кимни тушириш ҳақида бош қотиришидан хурсанд бўлиши мумкин. Аммо, деярли топ бўлмаган ҳужумчилар билан мураббийдан қандайдир натижа талаб қилиш қийин.
Хави жамоага келган заҳоти ўзи учун кашф қилган футболчи Абденинг тақдири бироз қийинлашди. Абдеда ажойиб иқтидор борлиги аниқ, аммо энди асосий таркибдан жой учун курашиш футболчига анча қийин бўлади. Яқинда унинг асосий таркиб учун курашаётган рақиблари унчалик машҳур футтболчилар эмас эди. Аммо, ҳозир Англия Премьер-лигасида ўзига яраша ном қозонган футболчилар билан курашишга тўғри келади. Бошқа томондан, рақобат Абде ўсишига ёрдам бериши.
«Барселона» раҳбариятига январь ойидаги трансферлар учун энг юқори баҳони берилиши мумкин. Каталонияликлар катта бюджетга эга бўлмасдан туриб, йиллар давомида ёпиши керак позицияни ёш ва истиқболли испаниялик футболчи билан тўлдиришга муваффақ бўлди, шунингдек, ҳужумда яна иккита бўш ўринни мустаҳкамлади. Бу ёғига Хави жамоани тўғри бошқариши ва Ла Лиганинг кучли 4 талигидан жой олиши керак бўлади.
