Эрон миллий терма жамоаси 17 апрель куни Бирлашган Араб Амирликлари терма жамоасига қарши ўртоқлик учрашувида майдонга тушади. Бу ҳақда ФИФА расмий сайти хабар бермоқда. Эслатиб ўтамиз, Эрон ЖЧ-2014 саралаши доирасида Ўзбекистоннинг рақиби ҳисобланади. Жамоалар 3 июнь куни Тошкентда бўладиган ўзаро ўйин билан 4-саралаш босқичини бошлашади.

Қайд этиш жоиз, Эрон билан ўйин арафасида Ўзбекистон терма жамоаси 22 май куни Тошкентда йиғин бошлайди, беш кундан сўнг эса ўртоқлик учрашуви ўтказиш режалаштирилган. Ҳозирча рақиб жамоа номи номаълум.

Дастлабки режага кўра, 27 май куни Уммон терма жамоасига қарши ўртоқлик учрашуви ўтказилиши керак эди, бироқ уммонликлар сўнгги лаҳзада саралаш мусобақасига тайёргарлик режасини ўзгартиришди ва шу сабаб билан Ўзбекистон ташриф буюрмайдиган бўлишди.

Шунга қарамай, Ўзбекистон футбол федерацияси шу кунларда турли миллий терма жамоалар билан фаол музокаралар олиб бормоқда ҳамда 27 май куни Ўзбекистон миллий терма жамоаси иштирокида ўртоқлик учрашуви ўтказилиши эҳтимоли катта.

Куни кеча Ўзбекистон терма жамоаси бош мураббийи Вадим Абрамов иштирокида бўлиб ўтган матбуот анжуманида ҳам ўртоқлик ўйини билан боғлиқ масала кўтарилган эди.

«Уммон ўзининг тайёргарлик режасини ўзгартирди. Иордания бизга чиқди, бироқ ўзимиз бу таклиф рад этдик. Шу кунларда рақиб изланмоқда. Агар топсак, 27 май куни албатта Тошкентда ўйин ўтказамиз», - дея қайд этиб ўтганди Абрамов.