«Атлетико» бош мураббийи Диего Симеоненинг айтишича, жамоанинг ўйини Фалькао ҳамда Адриан Лопесга боғлиқ. Бу ҳақда «AS» газетаси хабар бермоқда.

Европа Лигаси чорак финал жавоб учрашувлари доирасида «Атлетико» сафарда Германиянинг «Ҳанновер» клубини 2:1 ҳисобида мағлубиятга учратди. Жамоага ғалаба келтирган голлар айнан Адриан Лопес ва Радамель Фалькао ҳисобига ёзилди.

Испанияда бўлиб ўтган дастлабки учрашувда ҳам «Атлетико» 2:1 ҳисобида ғалаба қозонган эди.

«Бугун жуда ҳам эътиборга молик кун, чунки «Атлетико» ўз ўйини билан қанчадан-қанча одамларга қувонч ҳадя этди. Ўзингни Европанинг энг яхши жамоаларидан бири сифатида ҳис қилиш жуда ҳам яхши», деди Симеоне.

«Бир оғиз Фалькао ва Адриан Лопес ҳақида гапирсам. «Атлетико»нинг ўйини шу икки футболчига боғлиқ», дея қўшимча қилди Мадрид клуби бош мураббийи.

Маълумот ўрнида, Европа Лигаси яримфиналида «Атлетико» Испаниянинг бошқа бир жамоаси – «Валенсия»га қарши тўп суради.