ФИФАнинг клублар ўртасидаги жаҳон чемпионати мусобақаси ўзининг энг қизиқарли босқичига кириб бормоқда, Чемпионлар лигаси ва Либертадорес кубоги ғолиблари бош соврин учун асосий даъвогар ҳисобланишади. Ярим финалда “Челси” “Ал-Ҳилол”га, “Палмейрас” эса “Ал-Аҳли”га қарши баҳс олиб боради.
Ушбу турнирнинг барча ғолибларининг барчасини эслаймизми? Нега энди йўқ! Албатта, ёдга оламиз. Келинг, аввал Бразилиядан бошлаймиз!
Биринчи клублар ўртасидаги жаҳон чемпионати 2000 йилнинг январ ойида мамлакатларнинг энг кучли клублари ўртасида бўлиб ўтган. Унда “Реал Мадрид”, “Манчестер Юнайтед”, “Васко да Гама”, “Коринтианс”, Мексиканинг “Некаха”, Австралиянинг “Мельбурн”, Марокашнинг “Ража” ва Саудия Арабистонининг “Ан-Наср” клублари иштирок этишди. Икки гуруҳга бўлинган ҳолда, бир-бирига қарши ўйнади ва гуруҳ ғолиблари финалга йўл олишди.
Табиийки, ҳал қилувчи баҳсда мезбон жамоалар тўқнаш келишди. Ўйиннинг асосий, ҳамда экстра таймларида ҳисоб очилмади ва ғолиб номи пенальтилар сериясида аниқланди. Лотареяда “Коринтианс” жамоаси ғалаба қозонди. Ҳал қилувчи зарбани Эдмундо амалга ошира олмади. Ҳа, ўша Скотина лақабли Эдмундо.
2005 йил
Кейин бу мусобақада узоқ вақт танаффус бўлди, аммо Қитъалараро кубок бекор қилингандан сўнг, турнир 2005 йилда янги форматда қайтди: янги формат гуруҳларсиз бўлиб, дарҳол плей-оффдан бошланади. Янгича кўринишдаги клублар ўртасидаги ЖЧнинг финалига “Сан-Паулу” “Ливерпуль” жамоалри етиб келишди ва унда Бразилия клуби мерсисайдликларни 1:0 ҳисобида мағлуб этди. Ҳа, айтганча, бу турнир Япониянинг Йокогама шаҳрида бўлиб ўтган.
2006 йил
2006 йилда ҳам Бразилия вакили бўлган “Интернасионал” клуби финалга чиқди. Уларнинг рақиби эса бироз жиддийроқ “Барселона” эди. Аммо, Жанубий Америка вакиллари бу сафар ҳам кубокни уйларига олиб кетишди.
2007 йил
2007 йилда “Милан” кўҳна қитъа вакиллари орасида клублар ўртасидаги жаҳон чемпионатида ғолиб чиққан биринчи жамоа бўлди. Карло Анчелотти шогирдлари Аргентинанинг “Бока Хуниорс” жамоаси устидан ишончли ҳисобда ғалаба қозонди — 4:2.
2008 йил
2008 йилда “Манчестер Юнайтед” Европа футболи қолган қитъалардан анча илгарилаб кетганини исботлади ва манкунианликлар Эквадорнинг “ЛДУ Кито” жамоасини мағлуб этди. 73-дақиқада Уэйн Руни ягона голга муаллифлик қилди.
2009 йил
Пеп Гвардиола бошчилигидаги “Барселона” ҳам дунёнинг энг яхши жамоаси унвонидан бебаҳра қолмади. Каталония клуби 2009 йилги клублар ўртасидаги ЖЧда Аргентинанинг “Эстудиантес” жамоасини қўшимча дақиқалардагина мағлуб этди. Ягона голга эса албатта, Лео Месси муаллифлик қилди — 1:0.
2010 йил
2010 йилда Африканинг “Мазембе” клуби қора қитъа вакиллари орасида илк бор финалга чиқди. “Интер” Конго Демократик Республикаси клубини осонликча мағлуб этди — 3:0. Голларга Горан Пандев, Самуэль Это’о ва Жонатан Биабиани муаллифлик қилишди.
2011 йил
2011 йилда “Барселона” биринчи икки карра клублар ўртасидаги жаҳон чемпиони бўлган клуб бўлди. “Кўк-анорранглилар” финалда Неймар бошчилигидаги “Сантос”ни қийинчиликсиз мағлуб этди — 4:0.
2012 йил
Чамаси, “Коринтианс” “Барселона”ни олдинга ўтиб кетишини истамаган кўринади. Чунки, бразилияликлар Каталония клуби иккинчи марта ғолиб чиққанларидан бир йил ўтиб, ўзларининг иккинчи чемпионлигини нишонлашди. Улар финалда Рафа Бенитес бошчилигидани “Челси”ни мағлуб этиб, иккинчи чемпионлигини қўлга киритишди.
2013 йил
2013 йилда Африканинг иккинчи жамоаси “Ража” финалга чиқди, аммо бунда ҳам олдинги сценарий такрорланди. Лекин, бу сафар ушбу қитъа вакиллари Европанинг бошқа жамоаси – “Бавария”га имкониятни бой берди. “Бавария” — “Ража” – 2:0.
2014 йил
2014 йилнинг май ойида Серхио Рамос “Реал”га Чемпионлар лигаси бош соврини қўлга киритишда катта ёрдам берганди ва худди шу ишни клублар ўртасидаги жаҳон чемпионатида ҳам такрорлади. “Эл-капитано” Аргентинанинг “Сан-Лоренсо” клуби дарвозасига гол уриб, “қаймоқранглилар”ни ғалабага яқинлаштирган бўлса, 51-дақиқада Гарет Бэйл якуний нуқтани қўйди. Шу тариқа, “Реал Мадрид” ҳам бу совринни боши узра кўтариш бахтига ниҳоят сазовор бўлди.
2015 йил
2015 йилда “Барселона” сўнгги халқаро кубогини қўлга киритди. Месси ва Суареснинг голлари “Ривер Плейт”ни мағлуб этишга ёрдам берди. Ушбу ғалаба ҳозирча “кўк-анорранглилар” учун Европа ва жаҳон ареналаридаги охирги соврин бўлиб турибди. Кўрамиз, ушбу мавсум Европа лигасида ғалаба қозониб, ушбу серияга нуқта қўйишар!
2016 йил
Орадан бир йил ўтиб, 2016 йилда Криштиану Роналду бошчилигидаги “Реал” иккинчи бор жаҳон чемпионатида ғалаба қозонди. Португалиялик футболчи “Кашима Антлерс” дарвозасига нақд учта гол уришни уддалади. Якуний ҳисоб – 4:2.
2017 йил
2017 йилда “Реал Мадрид” клублар ўртасидаги жаҳон чемпионати чемпионлигини ҳимоя қилган биринчи жамоага айланди. Бу сафар Криш битта гол билан чекланди, аммо шунинг ўзи “Гремио”ни финалда мағлуб этиш учун етарли бўлди.
2018 йил
2018-йилда Роналду “Ювентус”га йўл олди, бироқ “Реал” БААнинг “Ал-Айн” клубини португалияликсиз ҳам мағлуб этди – 4:1.
Бу сафар голларни Рамос, Льоренте, Модрич каби футболчилар киритди. Шунингдек, арабликлар футболчиси Надер Мадрид клубининг 4-голига “муаллифлик” қилди.
2019 йил
2019 йилда кубок яна Англияга кетадиган бўлди. Финалда “Ливерпуль” “Фламенго”га қарши майдонда саф тортди ва 1:0 ҳисобида ғалаба қозонди. Ягона голга мерсисайдликлар ҳужумчиси Роберто Фирмино муаллифлик қилди.
2021 йил
2021 йилнинг февралида Бенжамин Паварднинг ягона голи “Бавария”га Мексиканинг “Тигрес” жамоаси устидан ғалаба қозонишга ёрдам берди. Шу тариқа “немис машинаси” ўз тарихида иккинчи марта ушбу совринни қўлга киритди.
Ҳозиргача Европа жамоари 13 та чемпионликни қўлга киритган бўлса, Жанубий Америкада атиги 4 та чемпионлик бор. 2022-йилда қайси қитъа клуби ғалаба қозонади деб ўйлайсиз?
Жамшиджон Маҳмудов тайёрлади.
