Бразилиянинг Амазонка штати чемпионатида иштирок этувчи "Ирандуба" ва "Сан-Раимундо" жамолари ўртасидаги баҳсда кўнгилсиз воқеа содир бўлди.
"Globo" сайтининг хабарига кўра, бош ҳакам "Ирандуба" жамоасининг футболчиси Дерланга сариқ карточка кўрсатганидан сўнг ҳакамга билдирмай қўли билан турли ҳаракатлар қилади. Буни пайқаб қолган майдон ташқарисидаги ёрдамчи ҳакам бош ҳакамни огоҳлантиради ва ҳакам иккинчи сариқ карточкани кўрсатиб, ўйинчини майдондан четлатмоқчи бўлганида, футболчи ҳакамга кетма-кет мушт тушириб, уни дўппослашга ҳаракат қилади.
Дерланнинг жамоадошлари ва уни тўхтатиб қолишга ҳаракат қилишади ва тезда майдонга чиқиб келган полиция ходимлари футболчини ҳибсга олишади. Бу вақтда "Ирандуба" жамоаси 2:1 ҳисобда ғалаба қозонаётган эди.
Бразилия полициясининг хабарига кўра, ҳакам ва ўйин комиссари шикоят хати ёзишган ва футболчининг тақдири яқин 24 соат ичида ҳал бўлади.
