"Ливерпуль" клуби сайти ўтказган сўровномага кўра Стивен Жеррард сайт фойдаланувчилари томонидан март ойининг энг яхши футболчиси деб топилди.
Хабарингиз бор, "Ливерпуль" сардори март ойида ҳамшаҳарлари бўлмиш "Эвертон" клубига қарши кечган чемпионат баҳсида ўз майдонларида 3:0 ҳисобида ғалаба қозонишган ва учала голга ҳам Стив Жи муаллифлик қилган эди.
31 ёшли футболчи учун клуб сайти фойдаланувчиларининг 39%и овоз берган бўлса, март ойининг иккинчи футболчиси бўлган Мартин Шкертел 19% овоз олди. Клуб ҳужумчиси Луиз Суарез эса 18% билан 3-ўринни банд қилди.
Ушбу ютуқ ҳақида гапирар экан Жерард шундай деди: "Албатта шахсий ютуқларни қўлга киритиш ҳар доим ёқимли, лекин мен ҳар доим таъкидлаб келганман, бу ютуқ жамоам ва унда ҳаракат қилаётган йигитларники".
"Эвертон" билан кечган баҳс ажойиб ўтди ва мен учун эсда қоларли бўлди. Лекин, ғалаба қозонганимизга қарамай, биз бир нечта имкониятлар кўкка совурдик."
"Биз учун март ойи жуда мураккаб ўтди. Жамоамиз лигадаги ўрни билан мақтана олмаймиз ва ўзимизни қўлга олиб, имкон қадар юқори ўринлар учун ҳаракат қилишимиз лозим. Умид қиламанки, апрель ойида ҳам бунданда мазмунли ўйин кўрсатишга ва Премьер-лигада юқори ўринларга кўтарилишга ҳамда Англия кубоги финалида муносиб иштирок қилишга ҳаракат қиламиз".
"Гарчи Премьер-лигада ўзимизга муносиб бўлмаган ўринда бораётган бўлсак ҳам, биз қандай кучга эга эканлигимизни ва ҳар қандай рақибни мағлуб эта олишимизни кўрсатдик".
Шунингдек, Жеррард унга овоз берган ҳамда қўллаб-қувватлаган мухлисларга мурожаат қилиб сабрли бўлишларини сўради: "Ўз ишингни ажойиб тарзда амалга ошираётганингни билиш албатта ёқимли. Ҳозир менга жамоадошларимни янада яхшироқ ва муносиб ўйин кўрсатишларига ундаш учун ёрдам зарур. Олдимизда ҳали мавсумнинг бир нечта ўйинлар турибди ва мен ишқибозларимиздан сабрли бўлишларини сўраган бўлардим, биз ҳаммасини тўғрилаймиз".
