“Утрехт” ҳимоячиси Виллем Янсен Нидерландия чемпионатида 400-ўйинини ўтказди. Бу 21-асрдаги чемпионат рекорди ҳисобланади. Уларнинг ярмидан кўпини 2013 йилдан буён ўйнаб келаётган "Утрехт" учун ўтказди. Ҳимоячи 2004/2005 йилги мавсумда "Венло" таркибида дебют қилган, 2007 йилда у "Рода"га, 2011 йилда эса "Твенте"га ўтган.
Шунингдек, 35 ёшли футболчи бир вақтлар Нидерландия У21 ёшлар терма жамоасига жалб қилинган. 35 ёшли Янсеннинг фаолиятидаги асосий ютуғи унинг мамлакат кубоги финалидаги ўйини – 2008 йилда “Рода” ва 2016 йилда “Утрехт” билан. Аммо ҳар икки сафар ҳам унинг жамоаси асосий баҳсда мағлуб бўлган.
