"Милан" бош мураббийи Стефано Пиоли Италия кубоги ярим финалида "Интер"га қарши ўйиндан олдинги фикрлари билан ўртоқлашди.

“Дербида “Интер”ни мағлуб этиш бизга куч ва ишонч бағишлади. Атмосфера жуда ижобий, биз концентрацияни йўқотмадик ва 90 дақиқа давомида ўйинни назорат қилдик. Бундай учрашувлар ҳар доим алоҳида ва муҳим, биз тайёрланамиз. Иккала клуб ҳам Италия Кубогида ғалаба қозонишни истайди ва биз жуда кучли рақибга қарши бор кучимиз билан ҳаракат қиламиз", дея Пиоли сўзларидан иқтибос келтиради Football Italia.

Италия кубогининг 2021/2022 йилги мавсуми 1/4 финали доирасидаги ўйинда “Милан” ўз майдонида Римнинг “Лацио” клубини қабул қилди. Миландаги “Сан-Сиро” стадионида бўлиб ўтган учрашув мезбонларнинг 4:0 ҳисобидаги ғалабаси билан якунланди.

Шу тариқа, “Милан” Италия кубоги ярим финалига йўл олди, Римнинг “Лацио”си эса турнирдаги ўйинини якунлади. Италия кубоги 1/2 финалида “Милан” аввалроқ “Рома” билан ўйинда ғалаба қозонган (2:0) “Интер” билан ўйнайди.