«Рома» бош мураббийи Луис Энрике Италия чемпионати 32-туридан ўрин олган «Лечче»га қарши учрашувдан сўнг ўз фикрлари билан ўртоқлашар экан, қайд этилган мағлубият учун ўзи жавоб беришини айтиб ўтди.
Эслатиб ўтамиз, «Лечче» ҳамда «Рома» ўртасидаги баҳс 4:2 ҳисобида майдон эгалари фойдасига ҳал бўлди.
«Бугун қайд этилган натижадан хафсалам пир бўлди, бироқ унда фақат футболчиларни айблаш адолатдан бўлмасди. Мағлубият учун жавобгарлик тўлиқ менинг елкамда», деди испаниялик мутахассис.
«Жамоам бугунги ўйинни бой берди ва фақат сўнгги беш дақиқа давомида ўйнади. Бугун биз жуда ҳам кўп қўпол хатоларга йўл қўйдик, йигитларнинг кайфияти ёмон», деди «Рома» устози.
«Бироқ биз курашишда давом этамиз. Мен истеъфога чиқиш ниятида эмасман ва бундай миш-мишлар қаердан пайдо бўлишидан ҳам яхши хабардорман», дея қўшимча қилди «Рома» бош мураббийи Луис Энрике.