«Милан» бош мураббийи Массимилиано Аллегри Италия чемпионати 31-турида «Фиорентина» билан ўйинда қайд этилган мағлубиятни «кутилмаган» дея баҳолади. Бу ҳақда «Football Italia» интернет-нашри хабар бермоқда.

Эслатиб ўтамиз, «Милан» – «Фиорентина» учрашуви 2:1 ҳисобида флоренцияликлар фойдасига ҳал бўлди. Ушбу мағлубиятдан сўнг «Милан» Италия «А» Серияси мусобақа жадвалида иккинчи ўринга тушди.

«Ушбу учрашувда мағлубиятга учрашимизни кутмагандик. «Фиорентина» майдонда бизнинг ишимизни сезиларли даражада оғирлаштирди. Жамоамиз чарчагандек кўринди, рақибга тезда ҳисобни тенглаштириш имконини бердик», деди Аллегри.

«Балки, биз бу пенальтига лойиқ эмасдик, бироқ бу Кассано билан боғлиқ вазият учун биз учун тўлов бўлди. Биз ҳакамларнинг қарорларини ҳаддан ташқари кўп муҳокама қилиб юбордик, шунинг учун ҳам бундай нарсаларни бироз хотиржам қабул қилиш керак», деди «Милан» устози.

«Ҳужумларни якунлашда жуда ҳам ҳолатларда шошилдик. Албатта, биз ғалаба қозонишни хоҳлагандик, бироқ бу нарса ўйин бўйича кўрсатмаларнинг бажарилмай қолиб кетишига сабаб бўлди. Мен футболчилардан қисқа тўп узатишлар билан ўйнашни илтимос қилгандим, улар бўлса узоқ масофага тўпни етказиб беришга киришиб кетишди», деди италиялик мутахассис.

«Ушбу баҳсда имкониятни бой берганимиз аламли. Энди «Ювентус»да биринчи ўринга чиқиб олиш имконияти бор», дея қўшимча қилди «Милан» бош мураббийи Массимилиано Аллегри.