Хабарингиз бор, кеча "Бунёдкор" Анталиядаги ўқув-йиғин машғулотлари доирасида учинчи синов назорат ўйинини ўтказди. Рақиб Россия ФНЛ иштирокчиси Астраханнинг “Волгарь” жамоаси бўлди. "Қалдирғочлар" ирода намойиш қилган ўйиндан сўнг рақиб жамоа бош мураббийи Андраник Бабаяннинг фикрлари билан қизиқдик.

-  “Бунёдкор”ни нафақат Осиёда, балки Европада ҳам билишади. Биз бу даражадаги рақибга қарши ўйин орқали ўзимизни нималарга қодирлигимизни текшириб олмоқчи эдик. Якунда шундай ҳам бўлди. Учрашув давомида кўриндики, “Бунёдкор” шаклланган жамоа. Сафида иқтидорли ёшлардан ташқари, тажрибали футболчилар ҳам бор. Тўғри, ҳозирги “Бунёдкор” таркибида бутун дунёни ўзига қарата оладиган легионерлар йўқ, аммо турли ёшдаги ҳамда Осиё қитъасидаги терма жамоа ўйинчилари етарлича.

Биламизки, “Бунёдкор”да ажойиб академия бор. Жамоа асосий урғуни тарбияланувчиларига қаратмоқда. Бу қийин йўл, бироқ қизиқарли ва келажаги бор. Бугунги рақибимизнинг мазкур қийин ва машаққатли йўлида омад тилайман!

Ўйин ҳақида нима дейишим мумкин? Биз бугун голга тортадиган хавфли вазиятларни кўпроқ юзага келтирдик. Рақиб иккинчи бўлимга тўлиқ янгиланган таркибда тушиб келган бўлса-да, биз ўзгаришни амалга оширмадик. Чунки эртага ҳам ўйинимиз бор. Бундай вазиятда барча футболчиларга юкламани тенг тақсимлаш керак.  Умумий маънода учрашув курашларга бой тарзда кечди. Тахминан баҳс ҳамкасбимга ҳам маъқул келди. Йиғинларга мос ўйин бўлди. Ўтказиб юборган голларимиз чиройли кўриниш олганини эътироф этиш жоиз.