Xabaringiz bor, kecha "Bunyodkor" Antaliyadagi o‘quv-yig‘in mashg‘ulotlari doirasida uchinchi sinov nazorat o‘yinini o‘tkazdi. Raqib Rossiya FNL ishtirokchisi Astraxanning “Volgar” jamoasi bo‘ldi. "Qaldirg‘ochlar" iroda namoyish qilgan o‘yindan so‘ng raqib jamoa bosh murabbiyi Andranik Babayanning fikrlari bilan qiziqdik.

-  “Bunyodkor”ni nafaqat Osiyoda, balki Yevropada ham bilishadi. Biz bu darajadagi raqibga qarshi o‘yin orqali o‘zimizni nimalarga qodirligimizni tekshirib olmoqchi edik. Yakunda shunday ham bo‘ldi. Uchrashuv davomida ko‘rindiki, “Bunyodkor” shakllangan jamoa. Safida iqtidorli yoshlardan tashqari, tajribali futbolchilar ham bor. To‘g‘ri, hozirgi “Bunyodkor” tarkibida butun dunyoni o‘ziga qarata oladigan legionerlar yo‘q, ammo turli yoshdagi hamda Osiyo qit’asidagi terma jamoa o‘yinchilari yetarlicha.

Bilamizki, “Bunyodkor”da ajoyib akademiya bor. Jamoa asosiy urg‘uni tarbiyalanuvchilariga qaratmoqda. Bu qiyin yo‘l, biroq qiziqarli va kelajagi bor. Bugungi raqibimizning mazkur qiyin va mashaqqatli yo‘lida omad tilayman!

O‘yin haqida nima deyishim mumkin? Biz bugun golga tortadigan xavfli vaziyatlarni ko‘proq yuzaga keltirdik. Raqib ikkinchi bo‘limga to‘liq yangilangan tarkibda tushib kelgan bo‘lsa-da, biz o‘zgarishni amalga oshirmadik. Chunki ertaga ham o‘yinimiz bor. Bunday vaziyatda barcha futbolchilarga yuklamani teng taqsimlash kerak.  Umumiy ma’noda uchrashuv kurashlarga boy tarzda kechdi. Taxminan bahs hamkasbimga ham ma’qul keldi. Yig‘inlarga mos o‘yin bo‘ldi. O‘tkazib yuborgan gollarimiz chiroyli ko‘rinish olganini e’tirof etish joiz.