Каталониянинг “Барселона” клуби ярим ҳимоячиси Педри 2021-йил ёзида эркин агент сифатида Франциянинг “ПСЖ” клубига ўтган Лионель Месси жамоасида етишмаётганини тан олди.
“Мен Мессининг ёнида ўйнашни ёқтирардим, у жамоага катта устунлик берган, аммо ҳозир бизда бошқа ўйинчилар бор. Мен жамоа учун хурсандман, лекин, тан оламан, биз Мессининг ўйинларини соғиндик. У сайёрамизнинг энг яхши футболчиси”, - деди Педри “Наполи”га қарши Европа лигаси 1/8 финал ўйини олдидан ўтказилган матбуот анжуманида.
Эслатиб ўтамиз, Педри жароҳати туфайли жорий мавсумнинг биринчи қисмини ўтказиб юборганди.
