Ўзбекистон миллий жамоаси аъзоси Рустам Ашурматов фаолиятини яна Суперлигада давом эттиради.
Наманганнинг "Навбаҳор" клуби 25 ёшли ҳимоячи билан шартнома имзолаганини эълон қилди.
"Маҳоратли ҳимоячи Рустам Ашурматов "Навбаҳор" билан шартнома имзолади. Ишончимиз комилки, у 2022 йилги мавсумда "Навбаҳор"нинг муваффақиятларига ўз ҳиссасини қўшади", - дея хабар беради клуб матбуот хизмати.
Маълумот учун, Ашурматов 1996 йил, 7 июль куни Қўқонда туғилган. Футболчилик фаолияти давомида "Бунёдкор" (2016-2018 йиллар), Жанубий Кореянинг "Кванчжу" (2019-2020), "Канвон" (2021 йил) клубларида ўйнаган. Рустам яқинда Кореядаги фаолиятини якунлаганини эълон қилди. У 2017 йил 23 январь куни Ўзбекистон миллий жамоасидаги дебютини нишонлаган.
