Аввал хабар берганимиздек, “Шўртан” жамоамиз янги мавсумга туртинчи боқичини шу йилнинг 10 февралидан бошлаб, Ғузордаги ўз қароргоҳида тайёргарлик машғулотларини бошлаган эди.
Режага асосан бош мураббий Асрор Алиқулов ўз шогирдлари билан йиғинни бугундан эътиборан Тошкент шаҳрида давом эттирадиган бўлди.
Пойтахтдаги йиғини 20-26 февраль кунлари давом этади. Бевосита йиғинга тўхталадиган бўлсак, машғулотлар билан биргаликда “Оқ бўрилар” жамоаси футболчиларининг жисмоний тактик фаолиятини кучайтириш ва ўйин амалиёти малакасини ошириш мақсадида бир нечта назорат ўйинларини ташкил этиш ҳам режадан ўрин олган.
Бу орқали мураббийлар гуруҳи таркибда шуғулланаётган футболчилар имкониятларини янада чуқурроқ билиб олишни ва ўйланган тактик схемага мослаштиришни мақсад қилишган.
Кўтарингки кайфият мавсумга пухта ҳозирлик кўриш, жамоавий ўйинни шакллантириш мақсадида эртага Тошкентнинг "Бунёдкор" клуби билан назорат учрашуви ташкил этилади.
Ҳар икки жамоа вакилларининг ўзаро келишувига кўра, мазкур ўйин соат 15:30да Тошкент шаҳридаги "Қибрай" спорт мажмуаси захира майдонида бошланади.
