«Арсенал» ўз бош мураббийи билан янги битим тузишни истайди. Хабарларга кўра, Микель Артетага ёзда янги шартнома таклиф этилади.
Испаниялик мутахассиснинг сўнгги ойлардаги ижобий натижалари клуб эгаси Стэн Кронкени хурсанд қилган. Шу сабаб, у АПЛнинг энг ёш устозини жамоада яна уч йил олиб қолишни ўйламоқда.
Артетанинг янги битимида йиллик маош яхшиланган бўлади. Айни дамда 39 ёшли мураббий учун йилига 5 миллион фунт маош тўланади.
Янги уч йиллик битимнинг умумий қиймати эса 25 миллион фунтни ташкил этиши айтилган. Микель Артетанинг жорий шартномаси 16 ойдан сўнг якун топади.
