«Барселона» «Челси»да ижара асосида ўйнаётган «Атлетико» ярим ҳимоячиси Сауль Ньигесга қизиқиш билдирмоқда, деб хабар беради Diario Sport нашри.

Манба берган хабарга кўра, «Барселона» бош мураббийи Хавига 27 ёшли испаниялик футболчининг ўйинлари ёқади. Каталония клуби қишки трансферлар вақтида ярим ҳимоячининг номзодини муҳокама қилган.

Қайд этилишича, Сауль каталонияликлар сафига ўтишни истамоқда.  Шу билан бирга, «Атлетико» «Барса»дан ҳужумчи Антуан Гризманннинг трансфери бўйича шартнома нархини пасайтириш мақсадида футболчини қўйиб юборишга тайёр.

Сауль жорий мавсум «Челси» сафида 17 та ўйинда майдонга тушиб, 1 та голли узатмага муаллифлик қилган. Ярим ҳимоячининг Мадрид клуби билан шартномаси 2026 йилнинг 30 июнига қадар амал қилади.