Россиялик тадбиркор Роман Абрамовичнинг шанба кунги баёнотидан сўнг хайрия жамғармаси васийлари «Челси» бошқарувини ўз қўлига олишга ҳали рози бўлмади, деб хабар бермоқда Sky Sports.

Қайд этилишича, васийлик ташкилотининг олти нафар аъзоси Британия хайрия қонунчилигига кўра, футбол клубига эгалик қилиш қанчалик қонуний бўлиши ҳақида кўпроқ маълумот олишни исташмоқда. Жамғарма ҳуқуқшунослари Абрамовичнинг ушбу таклифини амалга ошириш имкониятлари устида ишламоқда.

26 февраль куни Абрамович Россия-Украина муносабатларининг кескинлашуви фонида санкциялар қўлланилиши муносабати билан «Челси» бошқарувини Лондон жамоаси хайрия жамғармаси васийларига топширди. Абрамович ушбу ўтказишга қарамай, жамоанинг хўжайини бўлиб қолаверади.