Туриннинг «Ювентус» клуби ҳимоячиси Леонардо Бонуччи жароҳат олди.

Sky Sport Italia нашри хабарига кўра, италиялик футболчи «Эмполи»га қарши ўйинда ўзини ноқулай ҳис қилган ва шу сабаб «Фиорентина» билан учрашувни ўтказиб юборган. Бонуччи тиббий кўрикдан ўтди, натижада Леонардонинг чап оёғининг мушаги чўзилгани маълум бўлди. Қайд этилишича, ҳимоячи камида етти кун ўтказиб юборади ва кейинги ўйинда ҳам жамоасига ёрдам бермайди.

34 ёшли италиялик жорий мавсумда «Ювентус» сафида барча турнирларда йигирма бешта ўйин ўтказди ва учта гол урди. Бонуччининг туринликлар билан шартномаси 2024 йилнинг 30 июнига қадар амал қилади.