Россиялик ҳужумчи Павел Погребняк ижара муддати тугаганидан сўнг ҳам "Фулҳэм"да қолиш истагини билдирди. Футболчи Лондонда ўрнашиб, илгари Жозе Моуриньо истиқомат қилган уйда "уй тўйи" ўтказди.
Эслатиб ўтамиз, "коттежчилар" "Штутгарт"дан 28 ёшли рус ҳужумчисини қишки трансфер дарчаси очилганда ижарага олишган эди. Павел эса Англиядаги карьерасини уч ўйинда 5 та гол киритиб бошлади ва ўз шахсига қизиқишни бениҳоя ошириб юборди.
Маълумки, ёзда эркин агентга айланувчи Погребняк учун "Астон Вилла" ҳам курашиб кўрмоқчи. Бироқ, афтидан, Павел бир тўхтамга келганга ўхшаяпти — у "Фулҳэм"да қолишни истамоқда.
Яқинда Погребняк Жозе Моуриньо "Челси"ни шуғуллантирган вақтларда истиқомат қилган уйга кўчиб ўтди. "Коттежчилар" билан доимий шартнома имзолангач, Павел бу уйни харид қилмоқчи. Боз устига, Германиядан Лондонга ўзининг севимли "Порше" автомобилини ҳам олиб келган.
"Менга Лондон жуда манзур бўлмоқда. Яшаётган ҳудудим тўғрисида гапирсам, "Челси"дан Фрэнк Лэмпард, Бранислав Иванович ва Рамирес, "Фулҳэм"нинг бир қанча футболчилари билан қўшниман. Турган уйимда эса илгари Моуриньо яшаган".
"Фикримча, Англияда қолишим эҳтимоли жуда юқори. Мен, мураббий ва раҳбарият — "Фулҳэм"даги келажагим борасида якдилмиз", — деган Погребняк "Твой День" нашрига берган интервьюсида.