Бугун про лиганинг 1-тури доирасида “Зомин” клуби ўз майдонида “Андижон”ни қабул қилди. Мазкур учрашувда дарвозалар дахлсиз қолди – 0:0. Ўйиндан кейинги матбуот анжуманида “Зомин” бош мураббийи Асқар Умаров ўз фикрларини билдирди.

- Бугунги беллашув ҳақида қандай фикр билдира оласиз?

- Учрашув ҳақида гапирадиган бўлсак, албатта футболчиларимизга катта раҳмат айтаман. Улар биринчи ўйин бўлишига қарамай, шунчалик борини бериб ўйнашди. Мухлисларимизга қўллаб-қувватлагани учун ҳам катта раҳмат. Машғулотларимиздаги ҳаракатларимизни йигитлар майдонда кўрсата олишди, деб ўйлайман. Бугун озгина омадимиз келмади ва голларни уролмадик. Кейинги учрашувларда “Зомин” мухлисларига ғалабаларни тақдим қиламиз, деган умиддаман.

- Бугун “Андижон”дан қандай ўйин кутгандингиз?

- Улар тажрибали ва шунинг эвазига ҳаракат қилишяпти. Бўйдор ўйинчиларни олишган экан. Аммо бизнинг футболчиларимиз шунга мос равишда ўйнадилар.

- “Зомин” жамоаси ушбу учрашувда бир очкони қўлга киритдими ёки иккинчи очкони йўқотдими?

- Бу биринчи учрашув бўлганлиги сабабли биз бир очко қўлга киритдик, деб ҳисоблайман. Кейинги ўйинларда уч очколарни қўлга киритишга ҳаракат қиламиз. “Зомин” ўз уйида ҳеч кимга очко берадиган жамоа эмас. Фақат уч очко олиб, олдинга ҳаракат қиламиз.