«Манчестер Юнайтед» ҳужумчиси Криштиану Роналду АПЛнинг 28-тури доирасида «Манчестер Сити» билан дерби арафасида Португалияга учиб кетиб, мураббийлари ва жамоадошларини ҳайратда қолдирди. Бу ҳақда The Athleticхабар бермоқда.
Учрашув кеча бўлиб ўтган ва «шаҳарликлар»нинг ишончли ғалабаси билан якунланганди - 4:1. 37 ёшли португалиялик жароҳати сабаб ўйинда иштирок эта олмаслиги аниқ бўлгач, ватанига йўл олди. Эслатиб ўтамиз, Роналду сон қисмида муаммога дуч келган.
«Ман Сити»га қарши ўйиннинг аҳамиятини инобатга олган ҳолда, Роналдунинг уйга учиб кетиш қарори «қизил иблислар» кийиниш хонасида норозилик уйғотган. Жароҳатланган ўйинчилар ўйинларга боришлари шарт эмас, аммо «Манчестер Юнайтед» футболчилари Криштианунинг жамоага таъсирини ҳисобга олиб, унинг стадионда бўлиши фойдали бўлиши мумкинлигига ишонишади.
