Тошкентнинг "Бунёдкор" клуби собиқ бош мураббийи, Бразилия терма жамоасини бошқариб, 2002 йили жаҳон чемпиони қилган Луиз Фелиппе Сколари Осиё қитъасининг бир эмас икки миллий терма жамоаси таклиф билан чиққанлигини айтиб ўтди.
Хорижий оммавий ахборот воситаларининг фикрича, гап Ўзбекистон ва Қатар терма жамоалари хусусида бормоқда. Эслатиб ўтиш жойизки, Қатар терма жамоасини Сколарининг ҳамюрти Пауло Аутуори бошқармоқда. Ўзбекистонда эса мутахассис қарийб бир ярим йил ишлаган.
Бразилиялик мураббийнинг айтишича, ҳозирча унга норасмий таклифлар билан чиққан федерациялар вакиллари бош вазифа мамлакат бош терма жамоаларини Бразилия-2014 йўлида тайёрлаш ва мундиалга олиб чиқиш эканлигини билдиришган.
63 ёшли бразилиялик мураббий 2012 йил охирида "Палмейрес" клуби билан шартномаси якунига етгач, нима қилиши мумкинлиги ҳақида ҳали ўйлаб кўришга улгурмаган. Лекин Сколари фолиятини якунлашдан аввал бирор бир терма жамоада икки йил давомида мураббийлик қилишни хоҳлашини таъкидлаб ўтган.
