Польша терма жамоаси Шотландия терма жамоаси билан ўртоқлик учрашуви ўтказади, деб хабар беради мамлакат футбол иттифоқи (PZPN) матбуот хизмати.
Учрашув 24 март куни Глазгода (Шотландия) бўлиб ўтади.
Эслатиб ўтамиз, 24 март куни Польша терма жамоаси ЖЧ-2022 плей-офф ўйинида Россия термаси билан Москвада ўйнаши керак эди. Бироқ 28 февраль куни ФИФА ва УЕФА Россия клублари ва Россия терма жамоасини барча халқаро мусобақалардаги иштирокини тўхтатди.
Шу тариқа, Польша терма жамоаси автоматик тарзда Қатарда бўлиб ўтадиган жаҳон чемпионатининг якуний саралаш босқичига чиқди ва унда Швеция ҳамда Чехия ўртасидаги ўйин ғолиби билан ўйнайди.
Шотландия терма жамоаси эса 24 март куни Украинага қарши баҳс олиб бориши керак эди, бироқ саралаш ўйини 2022 йилнинг июнига кўчирилди.