Ўзбекистон футзал терма жамоасининг Озарбайжонга қарши ўртоқлик учрашувлари санаси маълум бўлди. Бу ҳақда ЎФФ расмий сайти хабар бермоқда.
Испаниялик мутахассис – Хосе Мария Мендез қўл остидаги Ўзбекистон футзал терма жамоаси Эронда ташкил этилган ўқув-машғулот йиғинларини якунлаб, 20 апрель куни Тошкентга қайтиб келди. Хориж йиғини давомида Эрон футзал терма жамоасига қарши иккита ўртоқлик учрашуви ташкил этилди. Дастлабки учрашувда 2:2 ҳисобида дуранг қайд этилган бўлса, иккинчи учрашувда эронликлар 4:1 ҳисобида ғалаба қозонишди.
Ўзбекистон футзал терма жамоаси навбатдаги хориж йиғинини 11-22 май кунлари Испанияда ўтказади. Бунгача Тошкентда йиғин ўтказадиган терма жамоа Озарбайжон футзал терма жамоасига қарши иккита ўртоқлик учрашувида майдонга тушади.
3-7 май кунлари Тошкентда меҳмон бўладиган Озарбойжон футзал терма жамоасига қарши дастлабки учрашув 5 май куни бўлиб ўтса, иккинчи ўйин 6 май куни ўтказилади. “Ўзбекистон” спорт мажмуасида бўладиган ҳар иккала ўйин соат 16:00да бошланади.
Футзал бўйича Ўзбекистон терма жамоаси 25 май – 1 июнь кунлари БААда бўлиб ўтадиган Осиё чемпионати финал босқичига тайёргарлик кўрмоқда. Мусобақада жамоа 16та терма жамоа иштирок этади, унда кучли тўртликдан ўрин олган жамоалар 1-18 ноябрь кунлари Таиландда ўтказиладиган жаҳон чемпионати йўлланмасини қўлга киритади.
