Футболда футболчиларни ҳеч ким жароҳатдан кафолатламаган. Футболчининг ёрқин ўйин намойиш этишига ҳам айнан жароҳат салбий таъсир кўрсатади. Мавсумга тайёргарлик кўриш учун Бирлашган Араб Амирликларининг Дубай шаҳрида машғулот олиб борган учун сафарга отланган “Шўртан” жамоаси сафида Ильнур Хазигалиев ҳам бор эди.

Кетма-кет икки йил “Шўртан” таркибида жуда яхши ўйин намойиш этган Хазигалиев кутилмаганда Дубайдан жароҳат билан қайтиб келди. Жароҳат Ильнур Хазигалиевнинг майдонга тушишига тўсқинлик қилди ва мана 4-тур якунига етган бўлишига қарамай, маҳоратли ярим ҳимоячини ҳали “Шўртан” таркибида расмий ўйинларда кўрганимиз йўқ.
Шунингдек, 2-тур доирасида бўлиб ўтган “Шўртан”-“Навбаҳор” жамоалари ўртасидаги баҳсда жиддий жароҳат олган Отабек Валижонов ҳам “Бунёдкор” ва “Металлург” жамоаларига қарши майдонга тушмади. Мана шу футболчиларнинг ҳозирги тақдирларини билиш мақсадида, клуб матбуот хизмати раҳбари Одилбек Толиповга мурожаат қилдик:

— Ҳақиқатдан ҳам, Ильнур Хазигалиевнинг Дубай шаҳрида ташкиллаштирилган йиғиндаги жароҳати ҳозиргача ўзининг салбий тарафларини кўрсатиб келди. Клубимиз шифокорлари Ильнур Хазигалиевни тиббий текширувдан ўтказишди ва муолажалар олиб боришди. Хайриятки, ярим ҳимоячимиз жароҳатдан фориғ бўлди ва бугун бўлиб ўтган “Бухоро” - “Шўртан” жамоалари ёшлари ўртасида кечган учрашувда бир тайм ҳаракат қилди. Насиб қилса, эртага асосий таркибга ҳам ёрдам беришга тайёр туради.

Отабек Валижоновга келадиган бўлсам, Отабек собиқ жамоасига қарши жонини жабборга бериб ўйнади ва бир қатор қўполликлардан сўнг, унинг суяги ёрилди. Маълум муддат гипсда юрди ва куни кеча гипс олиб ташланди. Тезкор ярим ҳимоячимизнинг ҳам ҳозирги кунга келиб соғлиги жойида. “Бухоро” жамоасига қарши олиб борилган машғулотлар жараёнида тўлиқ меҳнат қилди. Билишимча, бош мураббий Игорь Криушенко уни эртага асосий таркибда майдонга туширса керак — дейди, клуб матбуот хизмати вакили Одилбек Толипов.