Ҳозиргина “Эмирайтес” стадионида Лондон дербиси қандай бошланган бўлса, шундайлигича ниҳоясига етди. Деярли хавфли вазиятларсиз кечган ушбу ўйинда, ҳисоб очилмади ва “Арсенал” ўз майдонидаги қаторасига 16 та ўйинни голсиз тарк этмаётгани натижаси шу ерда тўхтади.
Икки кундан кейин “Нау Камп”га сафар қиладиган “Челси” таркибида Мата, Лемпард, Коул, Дрогба, Мейрелеш каби футболчилар захирада қолдирилди. Шундай бўлса-да, мезбонлар ўйинда яққол устунлик қила олмадилар. Фақатгина сўнгги 15 дақиқада босим бироз оширилди холос. Робин ван Перси яна майдонни голсиз тарк этди. Мавсум ўрталарида ажойиб сермаҳсуллик намойиш этган голландиялик футболчи сўнгги етти ўйинда атиги 1 та гол урганининг ўзи “Арсенал”нинг нега сўнгги пайтларда “кетмони” учмай қолганини ифодалайди.
Шундай бўлса-да, “Арсенал” очколар сонини 65 тага етказиб учинчи ўринни эгаллаб турибди. Лекин, кейинги ўринларда бораётган “Ньюкасл” ва “Тоттенҳэм” жамоалари ҳам йўқотилган очколар бўйича “Арсенал” билан тенг кўрсаткичга эгалар. Демак, 3-4 ўринлар учун кураш давом этади.
АРСЕНАЛ – ЧЕЛСИ 0:0
Арсенал: Шченсни, Санья, Косьельни, Вермален, Гиббс, Рэмзи, А.Сонг, Росицки (Диаби, 64), Уолкотт (Жервиньо, 60), Окслейд-Чемберлен (Андре Сантос, 69), ван Перси.
Челси: Чех, Босингва, Кэйхилл, Терри, Бертран (Э.Коул, 76), Эссьен, Ромеу (Оби Микел, 66), Малуда, Старридж, Калу (Мата, 74), Торрес.
Огоҳлантиришлар: Росицки (30), Малуда (49), ван Перси (50), Кэйхилл (54), Босингва (72), Диаби (76), Э.Коул (81).
