Саудия Арабистони Премьер-лигасининг 5-турида «Ан-Насср» клуби ўз майдонида “Ал-Файҳа”ни қабул қилиб, 1:0 ҳисобида ғалаба қозонди. Қувонарлиси, ягона гол 74-дақиқада миллий терма жамоамиз аъзоси Жалолиддин Машарипов ҳисобига ёзилди. Ўзбекистонлик футболчи ўйин ҳақида ўз фикрлари билан ўртоқлашди.

"Биз учрашувни яхши бошладик, аммо рақиб майдонда бир киши кам бўлиб қолгач, тўлиқ ҳимоявий ўйин намойиш эта бошлади. Биз эса тезроқ гол уриш мақсадида кўп хатога йўл қўя бошладик. Бу борада бизга бироз сабр етишмади.

Мураббий менга бугун ҳимояга ёрдам беришдан ташқари ҳужумга ўтишим кераклиги ҳақида ҳам кўрсатма берганди. Рақиб қизил карточка олгани туфайли, сафимизда икки нафар чап қанот ярим ҳимоячиси ўйнагани учун мен кўпроқ ҳужумга қўшилишим керак эди. Бундан ташқари, ҳимояга ёрдам беришни ҳам унутиб қўйганим йўқ.

Ҳа, аввалги баҳсда бурнимда жароҳат олгандим. Ўйиндан олдин барча мендан бу ҳақда сўради. Мен эса ҳаммаси жойида эканини айтдим. Ўз уйимизда ўйнаганимизда мухлислар биздан ғалаба кутишади. Бурнимда бироз оғриқ борлигига қарамай, бугун жамоага ёрдам бера олганимдан хурсандман. Энг муҳими биз ғалаба қозондик", — деди Машарипов.