Saudiya Arabistoni Premyer-ligasining 5-turida «An-Nassr» klubi o‘z maydonida “Al-Fayha”ni qabul qilib, 1:0 hisobida g‘alaba qozondi. Quvonarlisi, yagona gol 74-daqiqada milliy terma jamoamiz a’zosi Jaloliddin Masharipov hisobiga yozildi. O‘zbekistonlik futbolchi o‘yin haqida o‘z fikrlari bilan o‘rtoqlashdi.

"Biz uchrashuvni yaxshi boshladik, ammo raqib maydonda bir kishi kam bo‘lib qolgach, to‘liq himoyaviy o‘yin namoyish eta boshladi. Biz esa tezroq gol urish maqsadida ko‘p xatoga yo‘l qo‘ya boshladik. Bu borada bizga biroz sabr yetishmadi.

Murabbiy menga bugun himoyaga yordam berishdan tashqari hujumga o‘tishim kerakligi haqida ham ko‘rsatma bergandi. Raqib qizil kartochka olgani tufayli, safimizda ikki nafar chap qanot yarim himoyachisi o‘ynagani uchun men ko‘proq hujumga qo‘shilishim kerak edi. Bundan tashqari, himoyaga yordam berishni ham unutib qo‘yganim yo‘q.

Ha, avvalgi bahsda burnimda jarohat olgandim. O‘yindan oldin barcha mendan bu haqda so‘radi. Men esa hammasi joyida ekanini aytdim. O‘z uyimizda o‘ynaganimizda muxlislar bizdan g‘alaba kutishadi. Burnimda biroz og‘riq borligiga qaramay, bugun jamoaga yordam bera olganimdan xursandman. Eng muhimi biz g‘alaba qozondik", — dedi Masharipov.