Душанбе шаҳрининг марказида жойлашган Тожикистон Миллий кутубхонаси мажлислар залида Осиё-Океания кураш конфедерациясининг навбатдаги Конгресси бўлиб ўтди. Ушбу Конгресс Осиё-Океания кураш конфедерацияси раҳбариятига сайловлар бўлгани билан ҳам аҳамиятлидир.

Конгрессда ташкилот таркибидаги 25га яқин давлатдан делегатлар иштирок этди. Дастлаб кун тартибидаги асосий масала бўйича KSAO президенти Комил Рўзиев ҳисобот берди:

- Бугун қилинган ишлар сарҳисоби ҳақида ўйлар эканмиз, энг авалло шу йиғилишимизга соғ-саломат етиб келганимиз учун яратганга шукрлар айтамиз, - деди Комил Рўзиев ўз сўзида. – Сабаби, бутун дунёни ташвишга солган коронавирус пандемияси орамиздаги кўплаб инсонлар, дўстларимизни олиб кетди. Бундан ташқари олдимизга қўйган кўплаб режаларни, мусобақаларни ортга суришга ёки бекор қилишга сабаб бўлгани айни ҳақиқат.

Қадрли дўстлар! Ўтган вақт давомида 2 марта ёшлар, бир марта катталар ўртасида Осиё чемпионати, 10 га яқин турли даражадаги халқаро турнирлар ва семинарлар ўтказилди. 4та янги федерация KSAO аъзолигига қабул қилинди. Федерацияларни ҳар томонлама қўллаб-қувватлаш мақсадида кўплаб лойиҳалар ишлаб чиқилмоқда.

Конгрессда Саудия Арабистони кураш қўмитаси KSAO оиласига янги аъзо сифатида қабул қилинди. Шундан сўнг Конгресс кун тартибидаги ташкилий масалалар бошланди.

Ташкилот раҳбарлигига амалдаги президент Комил Рўзиев ягона номзод сифатида тавсия қилинди ва бир овоздан яна тўрт йилга қайта сайланди. KSAO биринчи вице-президенти этиб Ўзбекистон Республикаси Бош прокурори ўринбосари Бахриддин Валиев сайланди.

Маълумот учун: Баҳриддин Валиев 2016-2021 йилларда Халқаро кураш инсититути ректори, Тошкент шаҳар кураш федерацияси раиси сифатида фаолият юритган.

KSAO Бош котиби сифатида фаолият юритиб келаётган Фаррух Саидқулов яна мазкур лавозимга қайта сайланган бўлса, Эрон кураш федерацияси Бош котиби Короуш Хосёрар KSAO техник директори этиб сайланди.

Шунингдек, Конгрессда KSAO'нинг доимий қўмиталари раҳбарлари ҳам таништирилди:

Ҳакамлик қўмитаси – Пульсак Сажатамнукул (Таиланд),
Протокол қўмитаси – Франкоис Сааде (Ливан),
Аёллар спорти қўмитаси – Шамсия Саидова (Тожикистон),
Ҳуқуқ қўмитаси - Мохлис Ҳасан Ҳаидер (Ироқ),
Спортчилар қўмитаси – Нгуен Ҳуу Ан (Ветнам),
Матбуот ва ПР қўмитаси – Жамшид Намозов (Ўзбекистон),
Спорт қўмитаси - Чанг Каи Фенг (Хитой Тайпейи),
Тиббиёт қўмитаси – УзНАДА вакили,
Молия қўмитаси – Дониёр Рўзиев (Ўзбекистон),
Халқаро алоқалар қўмитаси – Амир Седиги (Эрон),
Таълим қўмитаси – Фарҳод Раҳимов (Ўзбекистон).

Конгресс якунида қитъамизда курашни янада ривожлантириш, миллий федерациялар фаолиятини яхшилаш бўйича режалар муҳокама қилинди.