«Ювентус» «Челси» аъзоси Антонио Рюдигерни сотиб олмоқчи.

Кеча Италия клуби 29 ёшли футболчи билан тўрт мавсумлик шартнома борасида келишиб олгани ҳақида маълумот пайдо бўлган эди, бироқ Goal.com бир нечта манбаларга таяниб, бу маълумотни рад этди.

«Ювентус» ёзда эркин агентга айланиши мумкин бўлган немис футболчиси атрофидаги вазиятни кузатиб бормоқда.

Рюдигер билан «Ювентус»дан ташқари «Реал», «ПСЖ» ва «Бавария» ҳам музокаралар олиб бораяпти.

Клублар футболчининг юқори маош талабидан норози бўлганлиги сабабли музокараларда қийинчиликлар пайдо бўлди.

Агар Роман Абрамовичга нисбатан қўлланилган санкциялар туфайли «Челси»дан чекловлар олиб ташланмаса, у ҳолда клуб ҳимоячи билан шартномани узайтира олмайди.

Қайд этилишича, санкциялардан аввал томонлар янги шартнома бўйича музокараларда сезиларли ютуқларга эришган.

Немис футболчиси «Челси»да қолишни истайди, у билан ҳафтасига 200 минг фунт стерлингга шартнома имзоланган. Бу немисни тарихдаги энг кўп маош оладиган ҳимоячига айлантиради.