«Рома» бош мураббийи Жозе Моуриньо муҳим дерби олдидан ОАВга мурожаат қилди. Португалиялик мутахассис Маурисио Сарри ва унинг жамоаси билан мухлисларга тўла стадионда тўқнаш келади.
Яқинда чиққан миш-миш хабарлар ва Пеллегринининг касаллигига ойдинлик киритиш мақсадида Моуриньо шундай деди: "Пеллегрини бугун ҳеч қандай муаммоларсиз машғулот ўтказди ва ўйинда майдонга тушади. Бу дерби. Бу бошқа ўйинлар каби баҳс эмас. Ҳаётимда жуда кўп дербиларда қатнашганман ва бундай ҳиссиётларга ўрганиб қолганман".
"Мухлислар билан тўлган стадионда ҳиссиётлар янада яхши бўлади. Бир қанча вақт ишқибозлар бундай ўйинларга кела олишмади, аммо ҳозир ўйинчилар каби стадионда. Икки дунё бирлашади ва бу мухлисларнинг ҳам дербиси бўлади. Мухлисларсиз футбол, футбол эмас. Ишқибозларсиз дерби, дерби эмас", - дея қўшимча қилди Моуриньо.
Земаннинг яқинда танқидий фикрига Моуриньо бош чайқаган ҳолда кулиб қўйди: "Жавоб бера олмайман. Мен 25 совринни ютганман, Земан эса 2 марта Б Серия чемпионлигини қўлга киритган. Траппатони каби инсонларнинг танқидини тушунаман, Земаннинг эмас".
Дерби учун жамоанинг ёндашуви ҳақида: "Тўғри ёндашув доим муҳим бўлиб келади. Ҳар доим, фақат дербида эмас. Ғалаба қозонаётган бўлсангиз, натижани ўз фойдангизга сақлаб қолиш учун кучга эга бўлишингиз шарт. Мағлубиятга учраётганингизда, охиригача нимадир қўлга киритиш учун кучга эга бўлишингиз талаб этилади", - дея фикр билдирди Жозе.
Шу ўринда бир фикр келиб қолди. Жозе Моуриньо кўпинча ўзининг ғайриоддий фикрлари, матбуот анжуманларида ўзини кўрсатиши билан ҳам анча машҳур. Лекин, унинг «Интер» ва «Челси» жамоалари, кейинчалик «МЮ»даги натижаларини ҳам эсдан чиқармаслик керак. Тўғри, унинг ҳам даври ўтган бўлиши мумкин. Аммо, қўлга киритган ютуқлари билан фахрлана оладиган мутахассис сифатида ёдда қолса керак.
Футбол мана шундай мутахассислар билан ҳам янада жозибали, турлича кўринишга келади. Тактика ва футболдан ташқари унинг атрофида бўлаётган вазиятларга бошқача фикр бера оладиган инсонлар ҳам керак аслида. Жозе Моуриньони мураббий сифатида ҳурмат қиламан, гарчи унинг характери оғир бўлса ҳам. Нима бўлганда ҳам Шомуродов ва унинг жамоадошларига португалиялик мураббий билан ишлашда омад тилаган ҳолда «Рома» ва «Лацио» ўйинини кузатиб боришга таклиф қиламан. Рим дербиси ҳақиқатан ҳам ўзгача ўтишига ишоняпман.
Нодир Абдурасулов
