«Барселона» ҳужумчиси Мемфис Депай ёзда жамоани тарк этиши мумкин. Mundo Deportivo хабарига кўра, 28 ёшли голландиялик футболчига асосий даъвогар «Тоттенхэм» ҳисобланади.
Депай хизматларига «Милан» ва «Ювентус» ҳам қизиқиш билдирмоқда. Лекин футболчининг ўзи фаолиятини Англияда давом эттирмоқчи.
Ҳужумчининг «Барселона» билан шартномаси 2023-йилнинг 30-июнига қадар мўлжалланган.
2021/22 йилги мавсумда Депай испан клуби сафида барча турнирлар доирасида 27 та ўйин ўтказиб, 10 та гол ва 2 та голга ассистентлик қилди.
Эслатиб ўтамиз, у ўтган ёзда эркин агент сифатида «Барса»га ўтган эди. Трансфермаркт портали футболчининг нархини 45 миллион еврога баҳоламоқда.
