“Шўртан” ҳамда “Олмалиқ” жамоалари ўртасидаги учрашув якунига етгач, ҳар икки жамоа бош мураббийлари ўртасида матбуот анжумани бўлиб ўтди. Дастлаб, журналистлар саволларига меҳмонлар бош мураббийи – Игорь Шквирин жавоб қайтарди.

    Игорь Шквирин (“Олмалиқ” клуби бош мураббийи):
— Ўйлашимча, ўйин жонли бўлди. Учрашув майдон эгалари ташаббусида ўтди. Айниқса, улар ўйин якунланиб бораётган паллада бизга нисбатан жуда кўплаб имкониятларга эга бўлишди. Биз асосан қарши ҳужум тактикасида ўйнадик ва ана шундай қарши ҳужумларнинг бирида гол киритдик. Ўйиннинг сўнгги дақиқасида ўз дарвозамиздан гол ўтказиб юбордик, бу — футбол. Бизнинг дарвозамиз устуни икки марта жонимизга оро кирди, сўнгра рақибларимизнинг бахтига дарвоза тўсини ишга тушди. “Шўртан” жамоаси жуда яхши шакллангани кўриниб турибди. Ҳозирда уларнинг 10 очкоси бор. Ишонаманки, “Шўртан” бу йил совринли ўринлар учун курашади.

 — Шогирдларингиз сафарда тўп сураётган бўлишига қарамай, очиқ футбол намойиш этишди.
— Мен шогирдларимга дастлабки 20-25 дақиқада дарвозамизга катта босим бўлишини айтгандим ва шундай ҳам бўлди. Биз эса имкон бўлди дегунча қарши ҳужумга ўтиш тактикаси тўп сурдик. Айни пайтда лигамизда энг ёш жамоа биз ҳисобланамиз. Балки, футболчиларимиз ёш бўлганлиги сабабли, бир қатор вазиятларда тажриба ва ишонч етишмади.

 — Шогирдларингиз ўйин вақтини атайин чўзгандек туюлди.
— Мен сизни нима деяётганингизни тушундим. Унутманг, биз араб жамоалари эмасмиз, футболчилар атай майдонга йиқилиб олганлари йўқ. Улар жароҳат олганларидан сўнг тиббий ёрдамга муҳтожликлари учун шифокорлар майдонга чиқишига мажбур бўлишди.

 — Ўз шогирдларингиз ва рақиб ҳақидаги фикрингиз?
— Биз ўз режамиз асосида тўп сурдик. Ҳимоямиз айтарли бехато ҳаракат қилди, ҳужумчиларимиз ҳам ёмон ўйнашмади, ҳар ҳолда вазиятлар содир этишди ва гол киритишди. Рақиб ҳақида гапирадиган бўлсам, “Шўртан” анча кучли ва тажрибали жамоа ҳисобланади. Агар улар ўзлари яратган имкониятдан фойдаланишганида, албатта, ғалаба қозонишган бўларди.