«Интер» клуби ўз дарвозабони Самир Хандановичга бир йиллик шартнома таклиф қилди, деб хабар бермоқда Tuttosport. Футболчининг ўзи эса икки йиллик шартнома таклиф қилинишини хоҳламоқда.
Манбага кўра, томонлар музокараларни давом эттиришмоқда. Катта эҳтимол билан 37 ёшли дарвозабоннинг маоши камаяди. Ҳозир Хандановичнинг маоши мавсумига 4 миллион еврони ташкил қилади. «Интер» футболчига фақат бир йиллик шартнома таклиф қилишга тайёр.
Ханданович «Интер» сафида 2012 йилнинг июлидан буён тўп суради. 2021/22 йилги мавсумда у 38 та ўйинда 30 та гол ўтказиб юборди ва 17 та ўйинда ўз дарвозаси даҳлсизлигини сақлаб қолди. Дарвозабоннинг клуб билан шартномаси 2022 йилнинг июнь ойида якунига етади.
