«Рома» футбол клуби ҳужумчиси Элдор Шомуродов ҳақида ҳужжатли фильм суратга олинади. Бу ҳақда Ўзбекистон футбол ассоциацияси биринчи вице-президенти Равшан Эрматов Россиянинг «Спорт-Экспресс» нашри журналисти Игорь Рабинер билан бўлган суҳбатда айтиб ўтди.

Афғонистон билан чегарадош, олис Жарқўрғон шаҳридан Римгача бўлган йўлни қандай босиб ўтиш мумкинлиги ҳақида

Биз ҳозирда айнан шу ҳақида ҳужжатли фильм суратга оляпмиз, бу ёш футболчиларимизни руҳлантиришда қўл келади. Улар баъзан ўзларига ишонмайди, Элдор эса ҳамма нарсанинг иложи борлигини исботлади. Агар характер бўлса, орзу сари интилса, доимий меҳнат ва фидойилик бўлса, ҳамма ишни уддаласа бўлади.

Унинг фаолияти ҳар доим ҳам муаммоларсиз ўтмаган, лекин ирода кучи у билан бирга ва ҳеч қачон бир ерда тўхтаб қолишига йўл қўймаган. Менимча, бу чегара эмас, Элдор ҳамон ўсиш учун салоҳиятга эга.

«Ростов»даги бир неча йил Шомуродовнинг ривожланишига ёрдам бергани ҳақида

Менимча, «Ростов»даги бу йиллар унга кўп нарса берди. Бу унинг фаолиятидаги муҳим босқич эди. Россия чемпионати қизиқарли ва жисмоний томондан кучли, бу эса Шомуродовнинг янада ўсишига ёрдам бериб, Европага ўтиши учун кўприк вазифасини ўтаб берди. Фаолиятидаги кейинги қадам учун тайёргарликни у «Ростов»да олди.

Элдор Шомуродов 2021/22 йил «Рома» сафида А Серияда 22 та ўйинда майдонга тушиб, 2 та гол ва 3 та голли узатмага муаллифлик қилди.

Рим клуби 2021 йил ёзида Элдор Шомуродовни «Женоа»дан 17,5 миллион евро эвазига харид қилганди. Шомуродов 2020/21 йилги мавсум бошида «Ростов»дан 7,5 миллион евро эвазига «Женоа»га ўтганди. Бунгача у «Машъал» ва «Бунёдкор» клубларида тўп сурган.