«Roma» futbol klubi hujumchisi Eldor Shomurodov haqida hujjatli film suratga olinadi. Bu haqda O‘zbekiston futbol assosiasiyasi birinchi vise-prezidenti Ravshan Ermatov Rossiyaning «Sport-Ekspress» nashri jurnalisti Igor Rabiner bilan bo‘lgan suhbatda aytib o‘tdi.

Afg‘oniston bilan chegaradosh, olis Jarqo‘rg‘on shahridan Rimgacha bo‘lgan yo‘lni qanday bosib o‘tish mumkinligi haqida

Biz hozirda aynan shu haqida hujjatli film suratga olyapmiz, bu yosh futbolchilarimizni ruhlantirishda qo‘l keladi. Ular ba’zan o‘zlariga ishonmaydi, Eldor esa hamma narsaning iloji borligini isbotladi. Agar xarakter bo‘lsa, orzu sari intilsa, doimiy mehnat va fidoyilik bo‘lsa, hamma ishni uddalasa bo‘ladi.

Uning faoliyati har doim ham muammolarsiz o‘tmagan, lekin iroda kuchi u bilan birga va hech qachon bir yerda to‘xtab qolishiga yo‘l qo‘ymagan. Menimcha, bu chegara emas, Eldor hamon o‘sish uchun salohiyatga ega.

«Rostov»dagi bir necha yil Shomurodovning rivojlanishiga yordam bergani haqida

Menimcha, «Rostov»dagi bu yillar unga ko‘p narsa berdi. Bu uning faoliyatidagi muhim bosqich edi. Rossiya chempionati qiziqarli va jismoniy tomondan kuchli, bu esa Shomurodovning yanada o‘sishiga yordam berib, Yevropaga o‘tishi uchun ko‘prik vazifasini o‘tab berdi. Faoliyatidagi keyingi qadam uchun tayyorgarlikni u «Rostov»da oldi.

Eldor Shomurodov 2021/22 yil «Roma» safida A Seriyada 22 ta o‘yinda maydonga tushib, 2 ta gol va 3 ta golli uzatmaga mualliflik qildi.

Rim klubi 2021 yil yozida Eldor Shomurodovni «Jenoa»dan 17,5 million yevro evaziga xarid qilgandi. Shomurodov 2020/21 yilgi mavsum boshida «Rostov»dan 7,5 million yevro evaziga «Jenoa»ga o‘tgandi. Bungacha u «Mash’al» va «Bunyodkor» klublarida to‘p surgan.