«Тоттенхэм» ҳимоячиси Мэтт Доэрти 2021/22 йилги мавсумда лондонликларга бошқа ёрдам бера олмайди.
30 ёшли футболчи «Астон Вилла»га қарши 32-тур учрашувида тиззасидан жароҳат олди ва ўйиннинг 21-дақиқасида алмаштирилди.
The Athletic нашри хабарига кўра, Доэрти 12 ҳафтагача сафдан чиқади. «Шпорлар»нинг Премьер-лигадаги сўнгги ўйини 6 ҳафтадан сўнг бўлиб ўтади.
Доэрти июнь ойида Ирландия Миллатлар лигаси ўйинларини ўтказиб юбориши мумкин.
Футболчи жарроҳлик амалиётига муҳтожми ёки йўқми, ҳозирча қарор қабул қилинмаган. Жамоа шифокорлари футболчининг тиззасидаги шиш кетишини кутишмоқда.
Доэрти жорий мавсумда «шпорлар» сафида Премьер-лигада 15 та ўйин ўтказди.
